Хойд Солонгос, БНСУ-ын армийнхан харилцан гал нээсэн нь дэлхий нийтийн анхаарлын төвд байна. Одоогоор тус мөргөлдөөний улмаас дөрвөн иргэн амиа алдсан мэдээлэл дэлхийн хэвлэлүүдэд гарч байгаа билээ.

Энэ зөрчилдөөнийг далимдуулан Өмнөд Солонгост ажиллаж, амьдарч буй манай улсын 35 мянга гаруй иргэнд учир битүүлэг мессеж очиж эхэлсэн гэнэ.

Тодруулбал, "Энэ сарын 30-наас өмнө Монгол руугаа буцахыг шаардаж байна. Элчин сайдын яам" гэх агуулга бүхий мессеж манай иргэдийн гар утсанд очжээ. Үүнийг тус улсад суугаа манай Элчин сайдын яамныхан "Төрийн байгууллагын нэр хүндэд халдсан, иргэдийн амгалан тайван байдлыг алдагдуулах санаархал, болчимгүй үйлдэл" хэмээн үзэж Солонгост сурч хөдөлмөрлөж байгаа иргэддээ дээрх мэдээлэлд автахгүй байхыг анхааруулсан байна.
Н.Хулан